ग्लोबल गडचिरोली न्यूज,
गडचिरोली, ता. १५ : देसाईगंज तालुक्यातील विसोरा येथील प्राथमिक आरोग्य उपकेंद्रातील डॉक्टर आणि परिचारिकेच्या अक्षम्य निष्काळजीपणामुळे आदिवासी समाजातील एका गर्भवती महिलेला जीव गमवावा लागल्याची संतापजनक घटना घडली. ही माहिती मिळताच शिवसेना (उद्धव बाळासाहेब ठाकरे) पक्षाने ग्रामीण रुग्णालयापुढे आंदोलन करत दोषींच्या निलंबनाची मागणी केली. या आंदोलनाची दखल घेत आरोग्य विभागातर्फे समुदाय आरोग्य अधिकारी डाॅ. गणेश मुंडले आणि कंत्राटी आरोग्य सेविका उषा उके यांच्या कंत्राटी सेवासमाप्तीचे आदेश काढण्यात आले. मनिषा शत्रुघ्न धुर्वे (वय ३१), रा. विसोरा, असे मृत महिलेचे नाव आहे.
शिवसेना नेते सुरेंद्रसिंह चंदेल यांच्या नेतृत्वात शिवसैनिकांनी मंगळवार (ता. १५) देसाईगंज येथील ग्रामीण रुग्णालयापुढे आंदोलन करत दोषी डॉक्टर आणि परिचारिकेला निलंबित करेपर्यंत मृतदेह नेणार नाही, अशी भूमिका घेतल्याने तणाव निर्माण झाला होता. विसोरा येथील मनिषा धुर्वे हिची पहिलीच प्रसूती होती. त्यासाठी तिला रविवार (ता. १३) गावातीलच प्राथमिक आरोग्य उपकेंद्रात भरती करण्यात आले. तपासणी केल्यानंतर बराच वेळ होऊनही मनिषाची प्रसूती झाली नाही. त्यामुळे मनिषाच्या कुटुंबीयांनी रुग्णवाहिका बोलावून तिला देसाईगंज येथील ग्रामीण रुग्णालयात हलविण्याचा निर्णय घेतला. मात्र, विसोरा येथील उपकेंद्रातील कंत्राटी तत्त्वावर कार्यरत समुदाय आरोग्य अधिकारी डॉ. गणेश मुंडले आणि कंत्राटी परिचारिका उषा उके यांनी ‘आणखी थोडा वेळ थांबा, मनिषाची प्रसूती येथेच होईल’, असे तिच्या कुटुंबीयांना सांगून रुग्णवाहिका परत पाठवली. परंतु, तब्बल १२ तास उलटूनही मनिषा प्रसूत झाली नाही. शेवटी तिला ग्रामीण रुग्णालयात हलविण्यात आले. तेथील डॉक्टरांनी तपासणी केल्यानंतर त्यांनीही प्रसूती होईल, असे सांगितले. परंतु प्रसूती न झाल्याने मनिषाच्या कुटुंबीयांनी सोमवार (ता. १४) संध्याकाळी तिला ब्रह्मपुरी येथील खासगी रुग्णालयात हलविले. मात्र, डॉक्टरांनी मनिषाला मृत घोषित केले. तिच्या बाळाचाही पोटातच मृत्यू झाला.त्यानंतर मंगळवारी देसाईगंज येथे मनिषाची उत्तरीय तपासणीची प्रक्रिया सुरू झाली. तेथे शिवसेना (उद्धव बाळासाहेब ठाकरे) पक्षाचे माजी जिल्हाप्रमुख सुरेंद्रसिंह चंदेल, माजी उपजिल्हाप्रमुख अविनाश गेडाम, शहरप्रमुख विकास प्रधान, डिंपल चावला, जसपालसिंह चावला, सचिन राऊत, हितेश किलनाके आणि गावकऱ्यांनी आंदोलन करत दोषी डॉक्टर आणि परिचारिकांना निलंबित करेपर्यंत मृतदेह नेणार नाही, अशी भूमिका घेतल्याने तणाव निर्माण झाला होता. आरोग्य विभागातर्फे समुदाय आरोग्य अधिकारी डाॅ. गणेश मुंडले आणि कंत्राटी आरोग्य सेविका उषा उके यांच्या कंत्राटी सेवासमाप्तीचे आदेश काढण्यात आले आहेत.
