ग्लोबल गडचिरोली न्यूज,
गडचिरोली, ता. २३ : आदिवासी गौरव यात्रेमध्ये सहभागी झालेले सर्व प्राध्यापक सरोदवादक विजया रोहित कांबळे यांच्या सरोद वाद्याच्या स्वरांनी मंत्रमुग्ध झाले.
महाराष्ट्र राज्य प्राध्यापक विकास अकादमी व गोंडवाना विद्यापीठाच्या संयुक्त विद्यमाने प्राध्यापकांसाठी आदिवासी गौरव यात्रा या उपक्रमाचे आयोजन करण्यात आले होते. यामध्ये महाराष्ट्रातील विविध महाविद्यालयातील प्राचार्य, प्राध्यापक सहभागी झाले होते. या सहभागी प्राध्यापकांसाठी विजया कांबळे यांच्या सरोदवादन कार्यक्रमाचे आयोजन करण्यात आले.
विजया कांबळे यांनी सरोद वादनातून भावगीते, भक्तिगीते, गझल व विविध रागांचे सादरीकरण केले. त्यांच्या भावस्पर्शी वादनशैलीने उपस्थित भारावून गेले.सरोद हे दुर्मिळ वाद्य असून सरोद वादन करणाऱ्या त्या राज्यातील एकमेव महिला असल्याने उपस्थितांनी त्यांचे कौतुक केले. अभिजित राठोड यांनी तबला साथ केली. संचालन सहायक प्रा. रोहित बापू कांबळे यांनी केले. आदिवासी गौरव यात्रेच्या समन्वयक डॉ. प्रिया गेडाम यांनी विद्यापीठाच्या सहकार्याने या कार्यक्रमाचे नियोजन केले. उत्कृष्ट सरोदवादनाबद्दल सर्वांनीच सरोदवादक विजया कांबळे यांचे कौतुक केले.
——————————
