ग्लोबल गडचिरोली न्यूज,
गडचिरोली, ता. ४ : गडचिरोली जिल्ह्याच्या क्रीडा क्षेत्रातील प्रतिभेने पुन्हा एकदा राष्ट्रीय स्तरावर आपला ठसा उमटवला आहे. गोवा येथे आयोजित करण्यात आलेल्या पहिल्या अखिल भारतीय इनडोअर तिरंदाजी स्पर्धा-२०२६ मध्ये लॉयड्स स्पोर्ट्स अकादमी (एलएसए)च्या तिरंदाजांनी उल्लेखनीय कामगिरी करत सुवर्ण व रौप्य पदकांची कमाई केली.
गोवा अमेच्युअर आर्चरी असोसिएशनतर्फे आयोजित करण्यात आलेल्या या स्पर्धेला आर्चरी असोसिएशन ऑफ इंडिया तसेच स्पोर्ट्स अथॉरिटी ऑफ गोवा यांची मान्यता होती. देशभरातील विविध राज्यांतील प्रतिभावान तिरंदाजांनी या स्पर्धेत सहभाग घेतला होता. विविध वयोगटांमध्ये झालेल्या या स्पर्धेत युवा खेळाडूंमध्ये चुरशीची लढत पाहायला मिळाली.
लॉयड्स स्पोर्ट्स अकादमीची तिरंदाज दिया बॅनर्जी हिने अंडर-२१ गटात उत्कृष्ट कामगिरी करत सुवर्ण पदक पटकावले आणि आपल्या गटातील राष्ट्रीय विजेतेपदावर नाव कोरले. तर अकादमीचा तिरंदाज आदित्य नायगमकर याने अंडर-१८ गटात देशभरातील बलाढ्य प्रतिस्पर्ध्यांविरुद्ध दमदार प्रदर्शन करत रौप्य पदक जिंकले.
या दोन्ही खेळाडूंचे यश त्यांच्या कठोर परिश्रम, शिस्तबद्ध सराव आणि लॉयड्स स्पोर्ट्स अकादमीकडून मिळणाऱ्या दर्जेदार प्रशिक्षणाचे प्रतीक मानले जात आहे. अकादमी सातत्याने परिसरातील क्रीडा प्रतिभेला प्रोत्साहन देत असून युवा खेळाडूंना राष्ट्रीय स्तरावर स्पर्धा करण्यासाठी आवश्यक संधी व मार्गदर्शन उपलब्ध करून देत आहे.
या यशाबद्दल प्रशिक्षक, क्रीडाप्रेमी आणि विविध क्षेत्रातील मान्यवरांनी पदक विजेत्यांचे अभिनंदन केले आहे. त्यांच्या या उल्लेखनीय कामगिरीमुळे गडचिरोलीसह संपूर्ण जिल्ह्यातील युवक-युवतींना क्रीडा क्षेत्रात उत्कृष्टता गाठण्यासाठी नवी प्रेरणा मिळेल, असा विश्वास व्यक्त करण्यात येत आहे.
गडचिरोलीच्या क्रीडा इतिहासात आणखी एक सुवर्णपान जोडणाऱ्या या यशामुळे जिल्ह्याच्या शिरपेचात मानाचा तुरा रोवला गेला आहे.
