गडचिरोली, ता. २७ : पश्चिम बंगालमधील संदेशखाली येथील महिलांवरील अत्याचाराचा महिला समन्वय नारी शक्ती संघटनेने निषेध करत जिल्हाधिकारी संजय मीणा यांना आज निषेधपत्र सादर केले.
या निषेधपत्रात म्हटले आहे की, संदेशखाली (पश्चिम बंगाल) येथील महिला, बालके आणि कुटुंबांवरील अमानुष अत्याचार आणि हिंसाचाराला आमचा तीव्र विरोध आहे.सातत्याने घडत असलेल्या या घटना ४७ दिवसांपूर्वी इडीच्या अधिकाऱ्यांवर झालेला हल्ला आणि शेहजाद शेख फरार झाल्यानंतरच उघडकीस आल्या. राजकीय आणि धार्मिक कारणांनी प्रेरित झालेल्या या कृत्यांमुळे पोलिस प्रशासन आणि पश्चिम बंगाल सरकारचे अपयश समोर येते. लहान मुले व महिलांवरील अत्याचार, लैंगिक छळ, मारहाण अशा अनेक घटना सातत्याने उघडकीस येत आहेत.गुन्हेगारांकडून जमिनी बळकावण्याच्या अनेक घटना सातत्याने उघडकीस येत आहेत. या घटनांमुळे पश्चिम बंगालमधील महिला आणि मुलांच्या सुरक्षेची चिंताजनक स्थिती समोर आली आहे. परिस्थिती इतकी भीषण आहे, की अनेक दिवस अत्याचाराच्या घटना घडूनही पोलिसांनी एफआयआर नोंदवला नाही. राजकीय, धार्मिक आणि आर्थिक मुद्द्यांवर महिला आणि मुलांना लक्ष्य करणे अत्यंत अमानुष, अपमानास्पद आणि वेदनादायक आहे. या वेदनादायक घटनांचा आम्ही तीव्र निषेध आणि निषेध करतो. पश्चिम बंगालमध्ये होत असलेल्या या कृत्यांसाठी दोषींवर त्वरित कारवाई करण्यात यावी, सर्व दोषींवर गुन्हे दाखल करावेत व खटला जलदगती न्यायालयात चालवून लवकर न्याय मिळावा, सर्व पीडित महिला, मुले आणि कुटुंबीयांना त्वरित सुरक्षा आणि आर्थिक मदत देण्यात यावी, पश्चिम बंगाल सरकार आणि पोलिसांनी यावर त्वरित कारवाई करावी, केंद्रीय गृह मंत्रालयाने या सर्व घटनांची तत्काळ दखल घेऊन भारतीय संविधान व इतर कायद्याअंतर्गत योग्य ती कारवाई करावी, अशी मागणी करण्यात आली असून राष्ट्रीय महिला आयोग, राष्ट्रीय मानवाधिकार आयोग, राष्ट्रीय अनुसूचित जमाती आयोगाच्या हस्तक्षेपाचे आम्ही स्वागत करतो, असेही नमूद करण्यात आले आहे.
महिला समन्वय समितीच्या वतीने नारी शक्ती कार्यकारिणीच्या ५० महिलांनी स्वाक्षरी केलेले हे निषेधपत्र जिल्हाधिकारी संजय मीणा यांना सुपूर्द करण्यात आले. यावेळी महिला समन्वय गडचिरोलीच्या जिल्हा संयोजिका माणिक ढोले, सहसंयोजिका उज्ज्वला वालोदे, स्मिता भांडेकर, दीपाली काथवटे, तिलोत्तमा हाजरा, भारती तारगे, अलका मातेटवार, निर्मला कोटावार, रंजना भांडेकर आदी उपस्थित होत्या.
- ———————
