ग्लोबल गडचिरोली न्यूज,
गडचिरोली, ता. २५ : मुख्यमंत्री युवा कार्य प्रशिक्षण योजनेअंतर्गत राज्यातील पहिली नियुक्ती गडचिरोली जिल्ह्यातील सोनाली गेडाम या युवतीला मिळाली आहे. नागपूर विभागासाठी या योजनेअंतर्गत २९ हजार ५०० उमेदवारांच्या नियुक्तीचे उद्दिष्ट आहे. त्यापैकी ८ हजार ८४७ उमेदवारांची नोंदणी झाली असल्याची माहिती विभागीय आयुक्त विजयलक्ष्मी बिदरी यांनी आज (ता. २५) दिली.
मुख्यमंत्री युवा कार्य प्रशिक्षण योजनेचा दूरदृश्यप्रणालीद्वारे मुख्यमंत्री एकनाथ शिंदे यांनी आढावा घेतला. या योजनेच्या अंमलबजावणीसाठी नागपूर विभागाने पुढाकार घेतला आहे. या योजनेअंतर्गत खासगी व शासकीय अशा ८० आस्थापनांची नोंदणी करण्यात आली असून विभागात नोंदणी केलेल्या उमेदवारांना प्राधान्याने प्रशिक्षणासाठी नियुक्ती देण्यात येणार असल्याची माहिती बिदरी यांनी दिली. मुख्यमंत्री युवा कार्य प्रशिक्षण योजनेअंतर्गत गडचिरोली जिल्ह्याने प्रशिक्षण योजनेअंतर्गत पहिली नियुक्ती केल्याबद्दल विभागीय आयुक्त बिदरी यांनी गडचिरोली जिल्हा प्रशासनाचे अभिनंदन केले असून इतर जिल्हाधिकाऱ्यांनी या योजनेच्या प्रभावी अंमलबजावणीसाठी पुढाकार घेऊन दिलेले उद्दिष्ट पूर्ण करण्याच्या सूचना दिल्या आहेत. धानोरा येथील सोनाली गेडाम बीएससी व एमएससीआयटी असून त्यांची जिल्हा परिषदेच्या समाजकल्याण अधिकारी कार्यालयात डाटा एन्ट्री ऑपरेटर म्हणून नियुक्ती देण्यात आली आहे. त्यांना प्रतिमहा ६ महिन्यांपर्यत १० हजार रुपये विद्यावेतन मिळणार आहे. मुख्यमंत्री युवा कार्य प्रशिक्षण योजनेकरिता महास्वयंम या पोर्टलवर विभागातील ८ हजार ८४७ उमेदवारांनी नोंदणी केली आहे. यामध्ये नागपूर जिल्ह्यातील ३ हजार ६९२, वर्धा जिल्ह्यातील ८५५, भंडारा जिल्ह्यातील ९६६, गोंदिया जिल्ह्यातील १ हजार ८६६, चंद्रपूर जिल्ह्यातील १ हजार १७४ तर गडचिरोली जिल्ह्यातील २९४ उमेदवारांचा समावेश आहे. विभागातील ११ खाजगी तर ६९ शासकीय आस्थापनामध्ये नोंदणी झालेल्या उमेदवारांची नियुक्ती करण्यात येणार आहे. यासाठी १ हजार ७५८ पदे अधिसूचित करण्यात आले असल्याची माहिती बिदरी यांनी दिली. मुख्यमंत्री युवा कार्य प्रशिक्षण योजना, कौशल्य विकास, रोजगार व उद्योजकता, आयुक्त कार्यालयातर्फे राबविण्यात येणार आहे. उद्योजकांना त्यांच्या उद्योगासाठी आवश्यक असणारे मनुष्यबळ या योजनेअंतर्गत उपलब्ध करून देण्यात येणार असून या योजनेसाठी राज्य शासनाने ५ हजार ५०० कोटी रुपयांचा निधी उपलब्ध करून दिला आहे. या अंतर्गत बारावी पास झालेल्या उमेदवाराला प्रतिमहा ६ हजार रुपये, आयटीआय अथवा पदवी असलेल्यांना ८ हजार रुपये तर पदवीधर व पदव्युत्तर शैक्षणिक आर्हता असलेल्या उमेदवारांना १० हजार रुपये प्रतिमहा विद्यावेतन देण्यात येणार आहे. यासाठी उमेदवारांची किमान वय १८ व कमाल ३५ वर्षे असणे आवश्यक आहे. मुख्यमंत्री युवा कार्य प्रशिक्षण योजने अंतर्गत उद्योजक व विद्यार्थ्याने rojgar.mahaswayam.gov.in या संकेतस्थळाला भेट देऊन नोंदणी करता येईल. तसेच या वेबसाईटवर उद्योजकांना मागणी नोंदविण्याची सुविधा आहे. विभागात खासगी ११ व ६९ शासकीय अशा ८० आस्थापनांनी १ हजार ७५८ पदांची मागणी नोंदविण्यात आली आहे. या योजनेचा जास्तीत-जास्त युवकांनी लाभ घ्यावा असे आवाहन विभागीय आयुक्त विजयलक्ष्मी बिदरी यांनी केले आहे.
