ग्लोबल गडचिरोली न्यूज,
गडचिरोली, ता. १५ : गडचिरोली जिल्ह्याच्या पोलिसांनी माओवाद्यांचे कंबरडे अनेकदा मोडले असले तरी त्यांच्या कुरापती अधुनमधुन सुरूच असतात. आता पुन्हा त्यांनी कट करून पाहिला. पण माओवाद्यांनी साठा ठेवलेली स्फोटके नष्ट करत गडचिरोली पोलिसांनी त्यांचा घातपाताचा मोठा डाव उधळून लावला आहे. काही महिन्यांपूर्वी माओवाद्यांनी मरपल्ली पोलिस मदत केंद्राअंतर्गत येणाऱ्या करंचा गावाच्या जंगल परिसरात माओवाद्यांनी काही स्फोटके साठा (डम्प) करून ठेवली आहेत, अशी विश्वसनीय गोपनिय माहिती पोलिसांना रविवार १५ डिसेंबर सकाळी मिळाली होती. या माहितीच्या आधारे शोध घेऊन पोलिसांनी ही स्फोटके नष्ट केली.
रविवारी स्फोटकांच्या साठ्याचा (डम्प) चा शोध घेऊन ते निकामी करण्यासाठी तत्काळ जिमलगट्टाचे उपविभागीय पोलिस अधिकारी शशिकांत दसूरकर यांच्या नेतृत्वात मरपल्ली पोलिस मदत केंद्राचे पोलीस पथक व राज्य राखिव पोलिस दल (एसआरपीएफ)च्या एकत्रित पथकाने जंगल परिसरात शोध अभियान सुरू केले. शोध अभियाना दरम्यान पथकांना करंचा गावाच्या जंगल परीसरात स्फोटक साहित्यांचा साठा (डम्प) आढळला. त्यामध्ये एका प्लास्टिकच्या ड्रममध्ये अंदाजे एक ते दोन किलो स्फोटकांनी भरलेली किटलीतील (IED) आयईडी, तीन वायर बंडल, एक बॅटरी, एक डेटोनेटर आदी स्फोटक साहित्य होते. हा साठा (डम्प) संशयास्पद वाटल्याने साठा (डम्प) जप्त करण्याकरिता तत्काळ प्राणहिताहून एक बाॅम्ब शोधक व नाशक पथक (BDDS) घटनास्थळी पाठविण्यात आले. स्फोटक साहित्यांनी भरलेली किटली त्याच स्थितीत घटनास्थळी नियंत्रित स्फोटाद्वारे नष्ट केली. तसेच तीन वायर बंडल, एक बॅटरी, एक डेटोनेटर आदी साहित्य घटनास्थळावरून जप्त करण्यात आले व सुरक्षितरित्या मरपल्ली पोलिस मदत केंद्रात आणण्यात आले. या सर्व कार्यवाहीत सुरक्षा दलातील कोणत्याही जवानाला दुखापत झालेली नाही, तसेच सर्व पोलिस पथके मरपल्ली पोलिस मदत केंद्रात सुखरूप पोहचली. गडचिरोली पोलिसांच्या सतर्कतेमुळे माओवाद्यांचा मोठा घातपात घडवून आणण्याचा व सुरक्षा दलास नुकसान पोहचविण्याचा डाव हाणून पाडण्यात गडचिरोली पोलिस दलास यश प्राप्त झाले आहे. ही कार्यवाही पोलिस अधीक्षक नीलोत्पल, अपर पोलिस अधीक्षक (अभियान) यतीश देशमुख, अपर पोलिस अधीक्षक (प्रशासन) एम. रमेश, अहेरीचे अपर पोलिस अधीक्षक श्रेणिक लोढा यांच्या मार्गदर्शनात जिमलगट्टाचे उपविभागीय पोलिस अधिकारी शशिकांत दसूरकर यांच्या नेतृत्वात (BDDS) प्राणहिता पथकाचे सहायक फौजदार बंडू आत्राम व जवानांकडून पार पाडण्यात आली.
————————————–
