गडचिरोली, ता. २ : होळीच्या (धुळवड) दिवसापासून सुरू होणारा माँ गौरीच्या पूजेचा गणगौर उत्सव राजस्थानी समाजबांधवांनी जिल्ह्यात उत्साहात साजरा केला. यानिमित्त राजस्थानी महिला मंडळाने गडचिरोली शहरात काढलेली भव्य मिरवणूक सर्वांच्याच आकर्षणाचा केंद्रबिंदू ठरली.
माँ गौरीच्या पूजेचा गणगौर उत्सव तब्बल १६ दिवस चालतो. या सणानिमित्त अविवाहित मुली आपल्या भावी पती साठी ही पूजा करतात आणि उपवास करतात, तर विवाहित महिला आपल्या पतीच्या दीर्घायुष्यासाठी व्रत करतात. तिजेच्या एक दिवस आधी आई गौरा ईशरजी आणि तिचा मुलगा कनिराम यांच्यासोबत शहराच्या दौऱ्यावर निघून जाते. राजस्थानमधील सर्वात महत्त्वाच्या सणांपैकी एक असलेल्या चैत्र कृष्ण एकादशीच्या दिवशी स्त्रिया तलावातून किंवा विहिरीतून कलशात पाणी आणतात आणि पूजास्थळी स्थापित करतात. व्रताच्या काळात दररोज सकाळी आणि संध्याकाळी गौरी-शंकराची पूजा करून त्यांना फुले, फळे, अक्षत आणि अगरबत्ती अर्पण केली जाते. गणगौर हा सण भगवान शिव आणि माता पार्वतीच्या मिलनासाठी साजरा केला जातो. हा सण वैवाहिक सुखाचे प्रतीक आहे. या दिवशी स्त्रिया आपल्या पतीच्या दीर्घायुष्याची आणि सुखी वैवाहिक आयुष्याची कामना करतात. त्याचवेळी अविवाहित मुली चांगल्या वराला प्राप्त करण्यासाठी हा सण साजरा करतात. गणगौरची पूजा केल्याने घरात सुख, शांती, समृद्धी आणि समृद्धी नांदते. या दिवशी उपासना केल्याने जीवनात सुख, समृद्धी आणि प्रेम प्राप्त होते, अशी मान्यता आहे. मोठ्या गणगौरच्या दिवशी देवी पार्वतीला जितके जास्त दागिने अर्पण केले जातात तितकी घरामध्ये धन-समृद्धी वाढते, अशीही मान्यता आहे. गणगौर हा सण हिंदू दिनदर्शिकेतील पहिला महिना चैत्र (मार्च-एप्रिल) महिन्यात साजरा केला जातो.
—————————————
