ग्लोबल गडचिरोली न्यूज,
गडचिरोली, ता. ६ : विद्यार्थ्यांच्या सुरक्षिततेला सर्वोच्च प्राधान्य देत उपप्रादेशिक परिवहन विभागाच्या पथकाने बेकायदेशीरपणे कार्यरत असलेल्या सात स्कूल व्हॅनवर धडक कारवाई केली आहे. या कारवाईत विविध नियमांचे उल्लंघन करणाऱ्या वाहनांवर एकूण १ लाख २५ हजार रुपयांचा दंड ठोठावण्यात आला आहे.
गडचिरोली शहरातील विविध भागांमध्ये बेकायदेशीर स्कूल व्हॅन संदर्भात मिळालेल्या तक्रारींच्या आधारे, उपप्रादेशिक परिवहन कार्यालयाने तपासणी मोहीम राबवली. यामध्ये अनेक व्हॅनकडे आवश्यक परवाने आणि कागदपत्रे नसल्याचे आढळले. काही वाहनांमध्ये अनुमतीपेक्षा अधिक विद्यार्थी वाहतूक केली जात होती, तर काही वाहनांमध्ये विद्यार्थ्यांचे दप्तर वाहनाच्या टपावर ठेवले जात असल्याचे निदर्शनास आले. जप्त वाहनांची संख्या एकूण ७ व्हॅन असून वैध परवाना नसणे, विमा व फिटनेस कागदपत्रांची मुदत संपणे, विद्यार्थ्यांची क्षमतेपेक्षा जास्त वाहतूक आधी नियमांचे उल्लंघन केल्याने ही कारवाई करण्यात आली. शहरातील प्रमुख रस्ते व शाळांजवळील परिसरात ही कारवाई करण्यात आली. या वाहनमालकांवर सुमारे १.२५ लाख रुपये दंड ठोठावण्यात आला. मोटार वाहन कायद्यानुसार ही दंडात्मक कारवाई करण्यात आली असून पुढील तपासणी सुरू आहे. उपप्रादेशिक परिवहन अधिकारी किरण मोरे यांनी स्पष्ट केले की, विद्यार्थ्यांची सुरक्षितता ही आमची प्राथमिकता आहे. त्यामुळे अशा बेकायदेशीर वाहतूक व्यवस्थेला मुळापासून रोखण्यासाठी ही कारवाई करण्यात आली आहे. नियमभंग करणाऱ्या वाहनचालकांवर यापुढेही कठोर कारवाई केली जाईल. सर्व शाळा व्यवस्थापन आणि व्हॅन चालकांना त्यांच्या कागदपत्रांची व वाहनांची नियमित तपासणी करून ती वैध ठेवण्याचे निर्देश दिले आहेत. तसेच पालकांनी आपल्या मुलांसाठी वापरल्या जाणाऱ्या वाहनांची सुरक्षा व परवाने तपासून ते योग्य असल्याची खात्री करण्याचेही आवाहन त्यांनी केले. येत्या काही दिवसांत अजून तपासण्या आणि वाहतूक सुरक्षेसंदर्भात जनजागृती मोहिमा राबवण्यात येणार असल्याची माहिती त्यांनी दिली.
