ग्लोबल गडचिरोली न्यूज,
गडचिरोली, ता. २३ : देशाचे गृहमंत्री अमित शहा यांनी संसदेत भारतीय राज्यघटनेचे शिल्पकार डाॅ. बाबासाहेब आंबेडकर यांच्याबद्दल जे अवमानजनक वक्तव्य केले, त्यासाठी त्यांनी देशाची माफी मागून राजीनामा द्यावा किंवा पंतप्रधान नरेंद्र मोदी यांनी तत्काळ त्यांचा माफीनामा घ्यावा, या मागणीसाठी देशासह जिल्ह्यात काॅंग्रेसच्या वतीने मोठ्या प्रमाणात आंदोलने करण्यात येतील, अशी माहिती खासदार डाॅ. नामदेव किरसान यांनी सोमवार २३ डिसेंबर रोजी पत्रकार परीषदेत दिली.
या पत्रकार परीषदेत खासदार डाॅ. नामदेव किरसान म्हणाले की, १८ व्या लोकसभेच्या हिवाळी अधिवेशनात सत्ताधारी भारतीय जनता पक्षाकडून राज्यघटनेचा आणि राज्यघटनेचे निर्माते डाॅ. बाबासाहेब आंबेडकरांचा अवमान झाल्याची नोंद देशाच्या संसदीय इतिहासात झाली आहे. लोकशाही आणि संविधानिक मूल्यांचा अवमान करण्याची एकही संधी भाजप कधीच सोडत नाही. यावेळी मर्यादा ओलांडली आहे. राज्यघटनेला ७५ वर्षे पूर्ण झाल्यानिमित्त काँग्रेससह भारतीय आघाडीच्या पक्षांनी संसदेत सरकारकडे राज्यघटनेवर चर्चेची मागणी केली. अदानी, मणिपूर, संभल या विषयांवर सभागृहात चर्चेची मागणी सातत्याने फेटाळल्यानंतर राज्यघटनेवर चर्चेची विरोधकांची मागणी मान्य करण्यात आली. यावेळी काँग्रेससह सर्व पक्षांनी सरकारला लोकशाही आणि संवैधानिक मूल्यांशी बांधिलकीची आठवण करून दिली. गृहमंत्री अमित शहा म्हणाले की, आजकाल आंबेडकर, आंबेडकर, आंबेडकर, आंबेडकर, आंबेडकर, आंबेडकर म्हणण्याची फॅशन झाली आहे. देवाचे एवढे नाव घेतले असते तर सात जन्म स्वर्गात गेला असता. बाबासाहेबांचा अवमान करण्यात आला. पण खेदाची बाब म्हणजे अमित शहांना धडा शिकवण्याऐवजी पंतप्रधान नरेंद्र मोदी यांनी आरोप-प्रत्यारोपांचे राजकारण अधिक तीव्र केले. काँग्रेससह विरोधकांनी पंतप्रधान मोदींकडे अमित शहांच्या राजीनाम्याची मागणी केली आहे. यावेळी जिल्हाध्यक्ष महेंद्र ब्राह्मणवाडे म्हणाले की, देशभर आंदोलन करण्यात येणार असून गडचिरोली जिल्ह्यातही तालुकास्तरापासून आंदोलनाचे सत्र सुरू करण्यात येणार आहे. जोपर्यंत गृहमंत्री अमित शहा देशाची माफी मागून राजीनामा देणार नाहीत तोपर्यंत आंदोलने सुरूच राहतील असेही ते म्हणाले. स्थानिक सर्किट हाऊस येथे आयोजित पत्रकार परीषदेला खासदार डाॅ.किरसान यांच्यासह काॅंग्रेसचे जिल्हाध्यक्ष महेंद्र ब्राह्मणवाडे, महिला आघाडीच्या जिल्हाध्यक्ष अॅड. कविता मोहरकर, जिल्हा परीषदेचे माजी उपाध्यक्ष मनोहर पोरेटी, प्रभाकर वासेकर, वामन सावसाकडे आदींची उपस्थिती होती.
———————————
