ग्लोबल गडचिरोली न्यूज,
गडचिरोली, ता. १६ : राज्याचे मुख्यमंत्री तथा गडचिरोली जिल्ह्याचे पालकमंत्री देवेंद्र फडणवीस यांच्या उपस्थितीत गडचिरोलीमध्ये बुधवार (ता. १५)जहाल माओवादी नेता सोनू उर्फ भूपती याच्यासह ६१ माओवाद्यांनी शरणगती पत्करली. यावेळी उपस्थित मुख्यमंत्री देवेंद्र फडणवीस यांनी शरणागत माओवाद्यांचे जीवन सुकर व सुखमय करण्यासाठी सरकार करत असलेल्या प्रयत्नांची माहिती देताना आतापर्यंत शरणागती पत्करलेल्या ६८ माओवाद्यांना रोजगार दिल्याबद्दल लॉयड्स मेटल्स अॅंड एनर्जी लिमीटेडचे कौतुक केले.
लॉयड्स मेटल्स अँड एनर्जी लिमिटेड (एलएमईएल) ने महाराष्ट्र सरकार आणि गडचिरोली पोलिसांच्या समन्वयाने आतापर्यंत यापूर्वी शरणागती पत्करलेल्या ६८ माओवाद्यांना, तसेच माओवादी हिंसाचाराने बाधित झालेल्या कुटुंबांच्या १४ सदस्यांना रोजगार उपलब्ध करून दिला आहे, असे एकूण ८२ व्यक्ती प्रशासन, नागरी आणि बांधकाम कार्य, आणि यांत्रिक परिचालन यासारख्या विभागांमध्ये कार्यरत आहेत. शरणागत व्यक्तींचे औपचारिक शिक्षण मर्यादित होते हे ओळखून एलएमईएलने कौशल्य-आधारित पुनर्वसन मॉडेल लागू केले. सहभागींना कोनसरी येथील लॉयड्स कौशल्य विकास आणि प्रशिक्षण केंद्रात प्रशिक्षण देण्यात आले. कंपनीच्या कार्यबळात सामील होण्यापूर्वी संबंधित तांत्रिक कौशल्ये त्यांनी आत्मसात केली. मुख्यमंत्री देवेंद्र फडणवीस यांनीही एलएमईएलच्या उपक्रमाचे कौतुक केले. बुधवारी गडचिरोली येथील पोलिस मुख्यालयात आयोजित कार्यक्रमात मुख्यमंत्री फडणवीस म्हणाले की, आम्ही शरण आलेल्या माओवाद्यांचे उत्तम पुनर्वसन केले आहे. लॉयड्स मेटल्सने यापूर्वी शरणागती पत्करलेल्या माओवाद्यांना नोकऱ्या दिल्या आहेत. लॉयड्स मेटल्सचे व्यवस्थापकीय संचालक प्रभाकरन यांनी मला आश्वासन दिले आहे की शरणगत माओवाद्यांपैकी जे इच्छूक आहेत त्यांना प्रशिक्षण देऊन रोजगाराच्या संधी उपलब्ध करून दिल्या जातील. लॉयड्स मेटल्स एटापल्ली तालुक्यातील सुरजागड लोहखनिज खाणी चालवते. कोनसरी येथे डायरेक्ट रिड्यूस्ड आयर्न (DRI) आणि पेलेट प्लांटद्वारे कंपनीने आपला कार्यविस्तार केला आहे. २२ जुलै २०२५ रोजी मुख्यमंत्री फडणवीस यांनी कोनसरी येथे एलएमईएलच्या प्रस्तावित एकात्मिक पोलाद प्रकल्पाचे भूमिपूजन केले आणि ८७ किलोमीटर लांबीच्या स्लरी पाइपलाइन आणि लोहखनिज ग्राइंडिंग युनिटचे उद्घाटन केले. या प्रकल्पांमुळे प्रादेशिक अर्थव्यवस्था आणखी मजबूत होईल आणि अतिरिक्त रोजगाराच्या संधी निर्माण होतील अशी अपेक्षा आहे. व्यवस्थापकीय संचालक बी. प्रभाकरन यांच्या नेतृत्वाखाली एलएमईएलने स्थानिक रोजगार निर्मिती आणि कौशल्य विकासावर सातत्याने लक्ष केंद्रित केले आहे. एल टी गोंडवाना स्किल हब प्रायव्हेट लिमिटेड उपक्रमाद्वारे कंपनीने जुलै २०२५ च्या अखेरीस सुमारे १,४०० स्थानिक तरुणांना प्रशिक्षित केले.
कंपनीच्या अधिकाऱ्यांनी सांगितले की, उद्योग, सरकार आणि स्थानिक प्रशासनातील समन्वित प्रयत्नांमुळे गडचिरोलीमध्ये विश्वास, स्थिरता आणि आर्थिक प्रगतीचे वातावरण निर्माण होण्यास मदत होत आहे. एकेकाळी औद्योगिक विकासासाठी आव्हानात्मक प्रदेश मानला जाणारा गडचिरोली जिल्हा आता समावेशक आणि शाश्वत विकासाचे केंद्र म्हणून उदयास येत आहे, जो स्थानिक आणि शरणागती पत्करलेल्या माओवाद्यांना अर्थपूर्ण संधी देत आहे. सध्या येथे शेकडो तरुण प्रशिक्षण घेत आहेत.
——————————
