- ग्लोबल गडचिरोली न्यूज
- गडचिरोली, ता. १ : वेगवेगळ्या ठिकाणी पोचमार्गाची सुधारणा केलेल्या कामाचे एमबी रेकार्ड देण्याची मागणी कंत्राटदाराने केली तेव्हा त्याला तब्बल १ लाख ७० हजारांची लाच मागणारा धानोरा येथील जिल्हा परिषद बांधकाम उपविभागातील कनिष्ठ अभियंत्याला गुरुवार (ता.१) लाचलुचपत प्रतिबंधक विभागाच्या अधिकाऱ्यांनी ताब्यात घेतले. अक्षय मनोहर अगळे या कनिष्ठ अभियंत्याचे नाव आहे.
- तक्रारदार हा कंत्राटदार असून त्याने बोधनखेडा पोचमार्ग तुमडीकसा- हिरंगे, रेंगेगाव-गोटाटोला, मुरुमगाव-रिडवाही येथील रस्त्यांची सुधारणा करून एमबी मागितली. परंतु त्याकरिता कनिष्ठ अभियंता अक्षय अगळे याने संबंधित कंत्राटदारास १ लाख ७० हजार रुपयांची लाच मागितली. मात्र, लाच देण्याची मुळीच इच्छा नसल्याने तक्रारदाराने लाचलुचपत प्रतिबंधक विभागाकडे तक्रार केली. त्यानंतर या विभागाच्या अधिकाऱ्यांनी पडताळणी केली असता अगळे याने पंचासमक्ष लाच मागितल्याचे स्पष्ट झाले. याप्रकरणी अक्षय अगळे याच्यावर धानोरा पोलिस ठाण्यात गुन्हा दाखल करण्यात आला आहे. त्याच्या निवासस्थानाचीही झडती घेण्यात आली. एसीबीचे पोलिस अधीक्षक राहुल माकणीकर, अपर पोलिस अधीक्षक सचिन कदम, संजय पुरंदरे यांच्या मार्गदर्शनात व पोलिस उपअधीक्षक चंद्रशेखर ढोले यांच्या पर्यवेक्षणात पोलिस निरीक्षक श्रीधर भोसले, हवालदार राजेश पद्मगिरवार, संदीप उडान, संदीप घोरमोडे, प्रवीण जुमनाके, प्रफुल्ल डोर्लीकर यांनी ही कारवाई केली. अनेक सरकारी विभागात असे प्रकार घडत असून यासंदर्भात कठोर कारवाई करण्याची मागणी नागरिकांकडून होत आहे.
- ————-
